Саламаттыкты сактоо министри Динара Сагинбаева үй камагына чыгарылды

Азиз Батукаевдин бошотулушу боюнча камакка алынган мурдагы саламаттыкты сактоо министри Динара Сагинбаева үй камагына чыгарылды. Бул тууралуу бүгүн, 23-майда укук коргоо органдарындагы ишенимдүү булактарына таянып Super.kg жазып чыкты. 

Маалыматка ылайык, Динара Сагинбаева 16-майда Биринчи Май райондук сотунун чечимине ылайык 26-июнга чейин СИЗО-1ге камакка алынган. Анын баш коргоо чарасын өзгөртүү өтүнүчү менен жактоочусу сотко кайрылган. Биринчи Май райондук соту кечээ, 22-майда кечинде жактоочунун өтүнүчүн канааттандырып, Сагинбаеваны үй камагына чыгарган.

«Мыйзамдагы ууру» атыккан Азиз Батукаевдин абактан мыйзамсыз бошотулушу боюнча иш 2019-жылдын январь айында жанданган.  Анда Саламаттык сактоо министрлигинин кызмат адамдары  А. Батукаевге жалган «курч миелобласттуу лейкозу (М2-вариант)» диагнозун коюп, фактыларды жасалмалаганы аныкталган. 

2013-жылы Нарын шаардык соту дарыгерлердин бүтүмүнө таянып, Азиз Батукаевди мөөнөтүнөн мурда абактан бошотуу чечимин кабыл алган. Ошол эле күнү ал Бишкектен Россияга учуп кеткен.

Бул иш боюнча  2011-2014-жылы саламаттыкты сактоо министри кызматын ээлеп турган Динара Сагинбаева, Кыргыз илимий гематология борборунун эки кызматкери: онколог -дарыгер Эмиль Макимбетов менен гематолог Ирина Цопова камакка алынган. 21-майда экс-вице-премьер-министр Шамиль Атаханов дагы суракка чакырылып, ошол эле күнү Бишкек ШИИББдин Убактылуу кармоочу жайына киргизилген. 

Кийинчерээк Сагинбаеванын үй камагына чыгарылганын Жогорку Сот тастыктады.